Acoc Goddy Omara
Alebtong-Cukule me primary ame tye idistrict me Alebtong peko me pii odio gii atek me icel dok oweko kwo iyii akina otino odoko atek me icel.
Iyii akina cukule ame peko man odio gii atek me icel tye iye Angopet ame tye igomola Adwir, Akwanilum, Obile, Alebelebe igomola Omoro, Oteno iyii Abia, medo kede Amugo Quran ame tye igomola Amugo ducu iyii Alebtong district.
Alubere kede riport otin kwan kede opwonye tye ame myero owot gini ibor ping idiko me nino ducu itute me moyo pii.
Otin kwan kede opwonye me Amugu Quran Primary cukul otye ame owot gini ibor ping ame romo mayiro acel kulu itute me moyo pii iyonge en ame yam konyo gii medo kede lwak ame orumu dok onwo tye ite kanica ocilam ibale oko.
Juma Saidi Ogwang, ame obedo won kom SMC me Amugu Quran ilokere otito nii gin otemo me tucu pii idii cukul kanaca ento jo ame onwo tye atucu pii man obin oweko tic oko alubere kede peko me kit ame kanaca tye kede dok man oweko gii pwod abongo agam ingo kara dong ame myero otim gini me wek pii te bedo icukul kanaca.
Ogwang otito nii icawa nii gin dong okato kede moka me kwanyo apude me cente ame onywal orao ite yuba me PTA wek okony kede ocilam me oyik pii naca akadi kono bedi lwak ducu dang tio kede wek atoto ya te konyo kor otin kwan medo kede opwonye ame tye icukul kanaca.
Iyii Oteno Primary cukul ame tye igomola Abia otin kwan tye awot ibor ping me mayiro Ario kulu cako icukul naka idog kulu Apuc akong acel ame tye kanaca. Cukul man tye kede wel otino ame romo tutumia acel kede apar wie abor kulu kede opwonye aparwie abiro.
Moses Patrick Abor aedi me cukul man okobo nii miyo otino lubu icwil ame mako lweny ikom two owumpule me corona nibeo ilwoko cing odoko atek me icel acalo bala adwogi me can pii ikanaca.
David Kennedy Odong ame obedo won kom abic me Alebtong district otito nii peko me can lim tye ame odio gii atek me icel kan ame oweko pe tye kitoro ame oromo yiko kede tangci magi.
Robert Adiama Ekaju, RDC me Alebtong district omoko bang wudi keto lok nii gin otye ame onote kede dul acel ame pe jengere ikom gamente ame oboro nii Plan International itute me neno nii otucu pii wek kony kor otino kede opwonye ame otye gini kanaca.
